၂၀၂၃ခုနှစ်၊ နိုဝင်ဘာလ (၁၂) ရက် ။

   ကရင်နီပြည်နယ်တွင် နိုဝင်ဘာလ(၁၁)ရက်နေ့မှစတင်၍ ပြုလုပ်ခဲ့သော “၁၁.၁၁ စစ်ဆင်ရေး”(11.11 Operation) သည် တော်လှန်ရေးတပ်ဖွဲ့များဖြစ်ကြသည့် KA ၊ KNDF ၊ KNPLF ၊ DMO Local PDF ၊ မြို့ပြတော်လှန်ရေးတပ်ဦး(URF) အလယ်ပိုင်းတိုင်း ရှမ်းတောင်စစ်ဒေသခွဲ နှင့် ကယား(ကရင်နီ)စစ်ဒေသခွဲ PDF တပ်ရင်းများ အားလုံးပူးပေါင်း၍ စုစည်းညီညွတ်စွာ ဖြင့် အတူတကွ လုပ်ဆောင်စတင်ခဲ့သော စစ်ဆင်ရေးဖြစ်ပါသည်။

   စစ်ဆင်ရေး ပထမရက်တွင် ဒီးမော့ဆို၊ မိုးဗြဲ နှင့် လွိုင်ကော် မြို့နယ်များအတွင်းရှိ စစ်ကောင်စီတပ်များ ကာလကြာမြင့်စွာ အထိုင်ချတပ်စွဲထားသော စစ်စခန်း(၇)ခုကို မိမိတို့ တော်လှန်ရေးတပ်ပေါင်းစုံမှ အပြီးသတ်သိမ်းယူနိုင် ခဲ့ကြပြီး စစ်ကောင်စီတပ်ဖွဲ့များထံမှ လက်နက်ကြီး၊ လက်နက်ငယ် ပေါင်းစုံ (၁၀၀) နီးပါး နှင့် ခဲယမ်းကျည်ဆံ များကို သိမ်းဆည်းနိုင်ခဲ့ကာ တိုက်လေယာဉ်(၁)စီးကိုလည်း ပစ်ချနိုင်ခဲ့ပြီး စစ်ဆင်ရေးပထမနေ့အား စနစ်ကျသော စစ်ဆင်ရေးကွပ်ကဲမှုများဖြင့် အောင်မြင်စွာ စတင်နိုင်ခဲ့ပါသည်။

   စစ်ဆင်ရေးပထမနေ့တွင် တိုက်ပွဲများအတွင်း စစ်ကောင်စီတပ်မှ အလွန်အကျွံအသုံးပြုပစ်ခတ်ခဲ့သည့် လက်နက်ကြီးများသည် လူနေအိမ်များအနီးသို့ ကျရောက်ပေါက်ကွဲခဲ့ပြီး အရပ်သားပြည်သူထိခိုက်သေဆုံးမှုများ ရှိခဲ့သည်ကိုသိရ၍ မိမိတို့တော်လှန်ရေးတပ်ပေါင်းစုံမှ လွန်စွာစိတ်မကောင်းဖြစ်ရပြီး စစ်အာဏာရှင်အား ခုခံတော်လှန် ရသည့် တော်လှန်ရေး အခန်းကဏ္ဍတွင် စစ်အုပ်ချုပ်ရေးယန္တရားများ အခိုင်အမာရှိနေသည့် မြို့ရွာများအတွင်း၌ စစ်ဆင်ရေး၏ တစ်စိတ်တစ်ဒေသအဖြစ် မိမိတို့တော်လှန်ရေးတပ်ပေါင်းစုံမှ တိုက်ပွဲများ ဖော်ဆောင်နေရခြင်းအပေါ် မိဘပြည်သူများအနေဖြင့် နားလည်ပေးနိုင်မည်ဟု မျှော်လင့်ပါကြောင်းနှင့် အတူတကွလက်တွဲ၍ ပူးပေါင်းဆောင်ရွက် ပေးမည်ဟု ယုံကြည်ပါသည်။

   “၁၁.၁၁ စစ်ဆင်ရေး” (11.11 Operation) ၏ ရှေ့ဆက်တိုက်ပွဲများကိုလည်း ညီညွတ်မှုအင်အားဖြင့် စစ်အာဏာရှင်ဖြုတ်ချရေး၊ ကိုယ့်ကံကြမ္မာ ကိုယ်တိုင်ဖန်တီးနိုင်ရေးအတွက် စည်းလုံးစွာ၊ စနစ်ကျစွာဖြင့် အတူတကွ ရှေ့ဆက်လုပ်ဆောင်သွားမည်ဖြစ်ကြောင်း မိမိတို့ တော်လှန်ရေးတပ်ပေါင်းစုံ မှ ပူးပေါင်းထုတ်ပြန်အပ်ပါသည်။